Писма и балони за ГТЦ-Архитектите продолжуваат со одбраната

Добивај вести на Viber

Архитектите не се откажуваат од ГТЦ. Асоцијацијата на архитектите продолжува со манифестацијата „Го сакам ГТЦ“, со цел уште еднаш да и даде до знаење на надлежните дека не треба да се менува ликот на ГТЦ. Акцијата за заштита и зачувување на автентичниот лик на ГТЦ ќе биде обележана со низа настани, а деталите ААМ ќе ги соопшти во текот на денешниот ден. -Ние, што мислиме поинаку од оние кои ја заговараат интервенцијата на урбаната структура ГТЦ, ги продолжуваме протестните активности. Сметаме дека е потребно подобрување на сегашната состојба на тие простори и тоа само преку реставрација и програмско заживување на објектот на самиот ГТЦ, а низ една поширока јавна расправа и со оние кои ја обмислуваат и со оние кои ја живеат неговата архитектура. ГТЦ е нераскинлив дел од идентитетот на Скопје и представува негово градителско, историско и културно наследство заедно со останатите делови на неговиот урбан блок. Заради тоа мора да остане таков како што е, автентичен, градски, наш ...Заслужува почит и негување. Значи, се продолжува со структуирана серија на настани во следниот период воглавно секој четврток, воглавно дружења, воглавно тематски уметнички перфоманси, инсталации, мали концерти и други случувања од сферата на урбаната култура, се вели во соопштението на ААМ. Од АММ најавуваат дека акцијата ќе продолжи со различни форми на креативно изразување, јавно говорење и институционални реакции. 1. ГО САКАМ ГТЦ е порака која ќе ги потсети сите дека треба да истрајат во одбраната на ГТЦ така што ќе лебди испишана на стотина балони, во четврток, на 03.10.2013год. 2. Писма – овозможување на граѓаните да им се обратат на одговорните (самите ќе ги именуваат), да се обратат до носителите на одлуките за преправањето на ГТЦ со писма во кои ќе ги изнесат своите ставови, мислења и сугестии.Формата на писмото (темплеитот) ќе биде поставена и достапна на интернет, а писмото потоа ќе му биде врачено на адресираниот примач по пошта (на рака). 3. Настапот на Ана Христова и ДЈ ќе биде музичка илустрација на средба-муабет со подсетување во Жена парк, во четврток, на 03.10.2013год., во 19.30ч. (во зависност од временските услови) со дониран безалкохолен пијалок 4. Инсталација/изложба на сликарката Пандора Апостолоска Саздовска. Иницијативата  „Го сакам ГТЦ“ започна во јуни 2013-та година како реакција на проектот за нова фасада и доградба на Градскиот трговски центар со кој целосно би се уништила архитектурата на објектот, како и неговата урбанистичка улога на „улица“ низ централното градско јадро.  Архитектите во текот на првата иницијатива со  писма се обратија до сите надлежни институции и побараа да се зачува автентичниот лик на ГТЦ. Асоцијација на архитекти на Македонија е поддржана и  од професионалци од релевантни области, невладини организации и граѓани кои го сакаат и ценат ГТЦ  ја стартуваа оваа иницијатива. Борбата за  за зачувување на автентичноста на ГТЦ доби поддршка и од Здружението на сопственици на деловен простор во ГТЦ и жители на станбените кули.