Добивај вести на Viber
Српскиот премиер Александар Вучиќ синоќа го објави планот економски мерки со кои Србија на годишно ниво ќе штеди по 700 милиони евра. Планот вклучува и исклучително болна мерка - кратење на платите во јавниот сектор и на пензиите.
„Оние со најмали приходи ќе бидат заштитени, овие мерки нема да се однесуваат за нив. Платите на вработените во јавниот сектор нема да се намалуваат кај оние чија заработувачка е помала од 25.000 динари (околу 210 евра), а такви се 113.000 граѓани“, рече Вучиќ во неговото гостување на РТС.
Кога станува збор за пензиите, заштитени ќе бидат дури 60,2% од постарите граѓани кои земаат ниски пензии. Така, кратење ќе нема кај оние со пензија до 25.000 динари, додека кај останатите намалувањето ќе биде прогресивно. Најголем удар ќе понесат оние со највисоки плати и пензии, кои ќе мора да издвојат најголем процент од својата заработувачка.
Според Вучиќ, точната формула ќе се знае по состанокот со ММФ, а само од плати и пензии земјата годишно треба да заштеди по 400 милиони евра.
Со мерките за штедење ќе бидат опфатени и јавните претпријатија, на кои ќе им бидат намалени државните субвенции, а ќе се намалат и субвенциите за земјоделството.
Српскиот премиер сепак ги уверува граѓаните дека ваквите мерки ќе бидат привремени и оти мора да се издржат.
„Ако успееме со планираните мерки, веднаш на почетокот на 2016 година ќе барам зголемување на пензиите и на платите во образованието, здравството... А ако не успееме, секогаш може да се направи ново мнозинство кое ќе ја води земјата“, рече Вучиќ.
Европската банка за обнова и развој предвидува дека годинава Србија ќе влезе во рецесија, со пад на БДП за 0,5%, и тоа најмногу заради катастрофалните поплави кои ја зафатија земјата.