По 45 години ќе се реконструира железничката пруга од Ногаевци до Неготино

Добивај вести на Viber

Реконструкцијата на железничката пруга од Ногаевци до Неготино која е дел од Коридорот 10, треба да заврши за една година. Со тоа ќе се заокружи санирањето на 28-те црни точки на железничките пруги низ државата каде возовите мораат да се движат со намалена брзина поради старите и дотраени пруги. Зошто последниот ремонт на делницата Ногаевци - Неготино е извршен во 1968 година, односно пред 45 години.

Градежните работи на оваа делница ќе ги извршува бугарската компанија ЦК-13 Холдинг ЈСЦ, која денеска во Скопје го потпиша Договорот со Македонски железници - Инфраструктура. Планирано е за една година да заврши рехабилитацијата на оваа делница во должина од 31 километар за што се обезбедени средства во висина од 9,5 милиони евра од Европската банка за обнова и развој. Со ремонтот се предвидува да се изврши комплетна замена на дотраените дрвени прагови со армирани бетонски, комплетна замена на постоечките шини со нови стандард 60 кои за првпат ќе се применат на пругите во Македонија, како и реконструкција на пероните на стојалиштата Ногаевци, Стоби и Црвени Брегови и на станиците Градско, Кукуричани и Криволак. Бугарската компанија треба во рок од 90 дена да изврши пренесување на опремата до градилиштата и да изврши набавка на потребните материјали. Со реконструкцијата се очекува зголемување на безбедноста во железничкиот сообраќај и зголемување на брзината од 100 до 120 километри на час со која ќе се движат возовите.