По итна постапка задолжување од 50 милиони евра за патиштата

Добивај вести на Viber

На собраниската седница денеска Министерот Миле Јанакиески побара по скратена постапка да се гласа за законот за задолжување на Јавното претпријатие за државни патишта кај Европската банка за обнова и развој во износ од 50 милиони евра, пари потребни за  подобрување на квалитетот на патната инфраструктура во Република Македонија.  Овој закон еднаш веќе беше донесен, но како задолжување на државата, а сега мора да се донесе закон со кој заемопримач всушност ќе биде Јавното претпријатие. Бордот на Директори на ЕБОР е закажан за 19.02.2013 година кога се очекува банката и официјално да го прифати ЈП за државни патишта како иден заемопримач наместо Република Македонија како досегашен заемопримач, па оттаму се оправдува итноста на постапката. По усвојувањето на Законот за гаранција од страна на Собранието на Република Македонија и неговото објавување во Службен Весник на Република Македонија, предвидено е склучување на: •Договор за гаранција, кој ќе се склучи меѓу Република Македонија претставувана од Министерството за финансии и ЕБОР, и •Договор за заем, кој ќе се склучи меѓу ЈП за државни патишта и ЕБОР. Имајќи предвид дека со овој закон, Република Македонија ќе ги гарантира обврските на ЈП за државни патишта по Договорот за заем за Проектот за подобрување на постоечката регионална и општинска патна мрежа, потребно е да престане важењето на Законот за задолжување на Република Македонија со заем кај Европската банка за обнова и развој по Договорот за заем по Проектот за подобрување на постоечката регионална и општинска патна мрежа, објавен во Службен весник на РМ бр.5 од 13.01.2009 година, стои во образложението на законот. Заемот ќе биде доделен на ЈП за државни патишта под следните услови: Рокот за отплата е 11 години и варијабилна каматната стапка и тоа шестмесечен ЕУРИБОР зголемен за 0,50%. На износот на неповлечените средства од заемот ЈП за државни патишта ќе плаќа провизија на ЕБОР во износ од 0,25% од износот на заемот на годишно ниво.