Почесен конзул станува стратешки инвеститор во Македонија

Добивај вести на Viber

Почесниот конзул на Македонија во Антверпен, Рејес Лемесн, е сопственик на АИМ Греен Тецх, четвртиот стратешки инвеститор кој треба да биде озаконет во Собранието и на ЕСМ да му продава електрична енергија произведена од фотоцентрали и од гасни мотори.

Како што објави БИРН, станува збор за стартап компанија која нема претходни проекти во енергетиката, а од Владата рекле дека тоа што Белгиецот е почесен конзул не му донела повластена позиција.

Леменс, кој е познат по тоа што неговата компанија АИМ им ги гради фабриките на странските инвеститори во слободните индустриски зони, во изјава за БИРН рекол дека неговата инвестиција ќе биде „иновативен метод“.

На прашањето дали позицијата почесен конзул и честите контакти и пристап до високи владини функционери го ставаат во повластена позиција пред другите кандидати на конкурсот, Леменс е категоричен дека тоа нема влијание. Тој инсистира дека ништо не добива од Македонија, туку дека само носи инвестиции.

„Ништо не бараме, никакви субвенции, имаме земја, ние сакаме да донесеме пари, да направиме добро“, вели тој.

Како стратешки инвеститор, Леменс планира да инвестира 174 милиони евра во капацитети во Неготино, Могила, Гевгелија, Кичево, Илинден и во Петровец, каде што веќе поседува земјиште. Кога целосно би биле функционални, тие би задоволувале отприлика осум проценти од годишната потрошувачка на струја во Македонија. Во договорот и посебниот закон се предвидува државата да го откупува целото негово производство.