Почнаа консултации – Ердоган си бира наследник на премиерската функција

Добивај вести на Viber

Владејачката Партија на правдата и развојот во Турција соопшти дека консултациите се веќе започнати и оти кон крајот на август ќе го избере новиот турски премиер, кој ќе дојде на местото на Реџеп Тајип Ердоган кој ја презема претседателската функција. Новиот мандатар за состав на турската Влада ќе биде избран на конгрес на 27 август, а истовремено тој ќе биде и нов лидер на партијата. Според турскиот Устав, претседателот на државата мора да ја прекине партиската активност откако ќе биде избран на функцијата. На денешниот првичен состанок не било споменато ниту едно конкретно име за нов турски премиер, иако турските медиуми претходните денови најавуваа дека во случај на победа на Ердоган на претседателските избори, премиерската функција најверојатно ќе ја преземе досегашниот шеф на дипломатијата Ахмет Давутоглу, кој важи за негов близок соработник. Според официјалните податоци од турската изборна комисија, на вчерашните претседателски избори Ердоган извојува победа во првиот круг, освојувајќи 51,79% од гласовите. Неговиот најсилен противкандидат Екмеледин Ихсаноглу доби 38,44%, а курдскиот кандидат Селахатин Демирташ - 9,76% од гласовите. Излезноста на изборите беше 74,13%, што е релативно скромен одзив на гласачите во Турција, каде што гласањето е задолжително.