Почнува изградбата на „Јужен тек“ во Србија, Македонија сеуште чека

Добивај вести на Viber

Во Србија утре започнува изградба на делот од гасоводот Јужен тек каде ќе бидат инвестирани 1,9 милијарди евра. Почетокот на изградбата ќе биде означен со заварување на првата цевка во местото Шајкаш. Церемонијата според најавите ќе ја следат српскиот претседател Томислав Николиќ , српскиот премиер Ивица Дачиќ, министрите  за енергија на Русија и Србија, но и претседателот на Одборот на директори на Гаспром, Алексеј Милер. Меѓународниот гасовод Јужен тек , проект лансиран од страна на руската државна компанија Гаспром , во вредност од повеќе од 16 милијарди евра ќе доведе рускиот гас, преку цевки  под Црното Море и под копното преку Бугарија , Србија и Унгарија да стигне до потрошувачите во Западна Европа. Гасоводот Јужен тек е заеднички проект на неколку земји, но контролиран од страна на Русите , Германците, Италијанците и Французите, изјави генералниот секретар на Здружението за гас на Србија, Воислав Вулетиќ за Б92. Изградбата на Јужен тек во Србија ќе овозможи снабдување со гас на оваа држава, бидејќи во моментов Србите гас добиваат единствено преку гасоводот од Унгарија. За реализацијата на овој проект има енергетски договор меѓу Србија и Русија , потпишан на 25-ти јануари 2008 година, а кој вклучува продажба на НИС на рускиот „Gaspromnjeft“ за 400 милиони, а Гаспром исто така ќе поседува 51 проценти од подземното складиште за гас во Банатски Двор. Делот на Јужен тек низ Србија ќе биде долг 421 километр и предвидува изградба на две гранки - во Хрватска од 52 километри и во Република Српска од 105 километри. Се работ и проект на јужниот крак кон Македонија, пишува Б92. Изградбата на Јужен тек во Србија треба да биде завршена за две години. Капацитетот на гасоводот во Србија ќе биде 40,5 милијарди кубни метри годишно.