Почнува санацијата од поплавата во градинката „Раде Јовчевски – Корчагин“

Добивај вести на Viber

Од понеделник децата повторно треба да бидат сместени во градинката “Раде Јовчевски – Корчагин“, која беше зафатена од неодамнешните поплави во Скопје. Ова го договорија родителите на децата од поплавената градинка, директорката и воспитувачките на средба со градоначалникот на општина Центар Андреј Жерновски, каде изнајдоа начин да го решат проблемот настанат со поплавите.

Сепак, в четврток епидемиолошките служби ќе ги соопштат резултатите од земениот брис кои ќе покажат дали е воопшто можно сместување на децата, додека резултатите од проверките за безбедност на храна ќе бидат објавени за еден месец.

Квалитетна исхрана, до санирање на кујната во градинката, ќе се набавува од надворешен добавувач кој ќе ги поседува сите неопходни сертификати. Од денеска службите во општина Центар почнуваат со санирање на плочките.

Со ова се излезе во пресрет на родителите кои прашуваа каде да ги носат децата, бидејќи не можат да излегуваат од работа или да земат одмор. Средствата за санацијата ќе бидат обезбедени со итни измени во буџетот на општина Центар на првата наредна седница на Советот на општина Центар.

“Градоначалникот и општината веднаш ни излегоа во пресрет. Тој е голем дечар и многу ги сака децата, не е имун на состојбата и прави се’ за нивно добро“, рече директорката Злата Николиќ, негирајќи дека се пожалила на соработката со општината.

Внимателно ја следиме состојбата уште од првиот момент, изјави градоначалникот Андреј Жерновски, најавувајќи дека ќе преземе сè за да се санира состојбата.

“Направен е позитивен притисок за да може во најбрз можен рок децата да бидат сместени и да добијат најквалитетна исхрана. Од денеска почнува санацијата на плочките и за нас – децата се на прво место“, рече Жерновски.

Жерновски исто така посочи дека поплави, какви што имавме неодамна, се реткост, но со санацијата на градинката ќе се преземат мерки за ова да не се повтори.