Почнува втората фаза од преадаптацијата на штипската Филтер станица

Добивај вести на Viber

Градоначалникот на Општина Штип, Илчо Захариев и директорот на ЈП „Исар“, Никола Мицевски денеска остварија средба со претставници од словенската фирма „Искра системи“, која ќе ја реализира втората фаза од преадаптацијата на Филтер станицата.

Општина Штип од Република Словенија треба да добие грант со цел да се реализира втората фаза од преадаптацијата на Филтер станицата, со што ќе може да ја прима водата од Хидросистемот „Злетовица“.

- Првата фаза е при крај, додека во втората фаза, инсталирањето на апаратите и останатите инструменти ќе се реализира преку Искра системи од Словенија. За таа активност, Словенија дава грант од околу 415.000 евра, кои ќе се искористат по овој основ. Тие изразија и подготвеност, штом започнат работите, да бидат експедитивни и да завршат дури и пред предвидениот рок. Очекуваме дека веќе од септември, штипјани ќе пијат вода од ХС Злетовица, рече Мицевски.

Штипскиот градоначалник, Захариев најави дека договорот за донацијата за преадаптација на Филтер станицата ќе го потпише наредната недела.

- Јас имам обичај да ги проверувам договорите, да бидеме сигурно дека сето она што е ставено на хартија е издржано согласно сите прописи и Закони а од друга страна, за да се потпише договорот за донацијата, за овој грант, потребно е претходно Владата да го усвои меморандумот за соработка. Откако тоа ќе биде сторено, јас ќе го потпишам договорот. Тоа ќе се случи најверојатно идната недела, рече Захариев.

Општина Штип за реализација на првата фаза за преадаптацијата на Филтер станицата зеде кредит од околу 470.000 евра од јапонска „Џајка“, а првата рата од овој кредит треба да се плати во мај.