Подземна сообраќајница во Скопје нема да има, грандиозниот проект е скап!

Добивај вести на Viber

Градот Скопје времено се откажа од реализацијата на најавената сообраќајница под Кејот. Градоначалникот Коце Трајановски вели дека одлуката е донесена откако и на вториот тендер фирмите понудиле далеку повисоки цени од предвиденото за проектот. „Она што ни беше буџетирано односно 45 милиони евра заеднички со владата не беше ни блиску до најниската понуда од 67 милиони евра од една италијанска компанија. Втората беше 77 милиони и 90 милиони беше третата понуда од компанија“, изјави градоначалникот. За булеварот под Кејот градската власт веќе потроши околу 750 000 евра за проекти, студии и планови. Основната улога на сообраќајницата долга 1 300 метри е да го растовари метежот во центарот на Скопје, преку подземно поврзување на сообраќајниците околу Владата со оние кај Народната Банка на Македонија. Градот Скопје за овој проект планираше да се задолжи со близу 4,9 милиони евра преку издавање на обврзници на домашниот пазар. „Овој проект е од суштинско значење за решавање на сообраќајниот метеж во градот. Подземната сообраќајница директно ќе ги поврзува овие булевари и со изградбата на истата ќе се овозможи директна врска помеѓу источниот и западниот дел од градот. Со тоа ќе се растерети сообраќајот во малиот и големиот ринг бидејќи за патување од источниот во западниот дел на Градот, возачите нема да бидат принудени да ги користат улиците во малиот и големиот ринг, ќе се намали времето на патување од источниот до западниот дел на градот, ќе се зголеми брзината на патување од источниот до западниот дел од градот“, стоеше пред неколку месеци во образложението од Градот Скопје. Сега пак, според Трајановски, одложувањето на подземната сообраќајница, ќе се надополни со изведба на други решенија кои би го олесниле движењето на возилата низ Скопје. Не именуваше кои ќе бидат тие, но најави дека проектите наскоро ќе бидат јавно презентирани. Проектот за подземна сообраќајница би можел да се реактивира само кога ќе се најдат пари. Кога ќе биде тоа, никој не знае.