ПОЛУГОДИЕ: Економијата расте, месната индустријата е на колена!

Добивај вести на Viber

АНКЕТА: Како бизнисмените ја оценуваат првата половина од 2014? Првата половина од економската 2014 та заврши. Економијата преживеа двојни избори, и успеа во првиот квартал да испорача раст од 3,9%. Според оценките на надлежните институции овој позитивен тренд продолжил и во второто тромесечје. Оправување покажа и индустриското производство, односно во мај годинава во споредба со истиот период лани тоа пораснало за 4,5%. Дел од бизнис заедницата смета дека бројките ја одразуваат реалноста, други велат дека кризата во одредени сектори и индустрии се продлабочува. “Фактор“ анкетираше неколку стопанственици од различни сектори за тоа како го оценуваат првото економско полугодие. Јелисавета Георгиевска, Стопанска Комора: Состојбата се подобрува! “Според последните објавени податоци на Државниот завод за статистика, во периодот јануари - мај 2014 година, во однос на истиот период лани изндустриското прпизводство се зголеми за 4.5%. Гледано по сектори, индустриското производство во секторот рударство и вадење на камен во анализираниот период бележи пораст од 13.9%, во секторот преработувачка индустрија 16.2%, а во секторот снабдување со електрична енергија, гас, пареа и климатизација има опаѓање од 26.1%. Поаѓајќи од овие податоци според Стопанската комора на Македонија, динамиката на пораст на индустриското производство е во континуитет присутна изминатите пет месеци од 2014 година, што е позитивен резултат. Остварениот пораст е задоволителен. Економската состојба на деловните субјекти кон крајот на првата половина од 2014 година е генерално оценета како поповолна во однос на претходни месеци, а на тоа упатува и податокот дека очекувањата за обемот на производството во наредните три месеци се поповолни, според податоците на Државниот завод за статистика.“ - вели Гроргиевска од Стопанската Комора на Македонија и додава: “Стопанската комора на Македонија оценува дека реализираниот пораст на БДП во првото тримесечје на 2014 година е многу значаен и е за поздравување, бидејќи е реализиран во услови на се уште високи негативни импликации од економската и финансиската криза во поблиското и поширокот опкружување и се уште незаздравени економски состојби кај нашите позначајни стопански партнери. Мора да се напомене дека во структурата на порастот на БДП предничи градежништвото со 13,7%, по што следи финансиското посредување. Остварениот пораст на БДП во првото тромесечје е добра база за остварување на планираната динамика на пораст на БДП за 2014 година  од 3,2% според Владата на РМ и 3,7% според НБРМ. Во исто време извозот од земјава е во постојан раст, а за тоа придонесуваат многу и странските инвеститори присутни во земјата, што се гледа и во извозната структура.“ Влатко Ѓеоргиевски “МИК Свети Николе“: месната индустрија е на колена! “Ако се анализираат показателите за вкупната економија во првото полугодие тие укажуваат на заздравување на економијата. Но месната индустрија не е дел од овие параметри, ние видовме дека некои компании од овој сектор се затворија а до крајот на годинава ќе се затворат уште две компании. Сликата во нашиот бизнис и не е така роозва. Сегашната законска регулатива не донесе во нерамноправна положба. Ние од една страна имаме слободен узвоз на готови производи од друга страна имаме увозни суровини со големи давачки. И тука станува збор за нелојална конкуренција која директно го загрозува бизнисот“ - вели првиот човек на месната индустрија “МИК Свети Николе“ и додава: “Ние веќе ги губиме странските пазари а како што тргнало ќе го изгубиме и домашниот пазар. Во исто време во нашиот сектор се воведоа големи услогласувања со стандардите на Европската Унија, што дополнително значеше зголемување на трошоците на фирмите. Станува збор за безбедносни, транспортни и еколошки стандарди кои моравме да ги воведеме во услови на нерамноправна положба на пазарот“ – вели Ѓеоргиевски. Маријана Перковска, Текстилен кластер: Ниски цени, слаба конкурентност! “Ако ги анализираме показателите за БДП треба да се земе во предвид  дека голем удел имаат бесцаринските зони кои влегуваат во пресметка на БДП а немаат влијание врз домашната економија ниту врз стандардот на населението. Текстилните компании релативно беа ангажирани , ова значи дека дел од компаниите беа пребукирани со работа, а дел пак имаа повремено празни капацитети.“ – оценува Маријана Перковска од Текстилниот кластер и додава: “Глобално, капацетите се искористени но приходите за услугите на нашите текстилни компании не се доволни за одржливоста и развојот на оваа гранка .Поради големата конкуренција која доаѓа од останатите  балкански држави, цените се ниски а ние имаме далеку послаба продуктивност поради старосната структура на работниот кадар и недоволна автоматизација на производниот процес: “ – вели Перковска која смета дека во следниот период конкуренцијата се заострува. “Фактор“ ќе објави уште една анкета на прашањето “Какви се очекувањата на бизнисмените за второто економско полугодие“.