„Пониски сметки, почист воздух и европски стандарди“: Министерство за енергетика по усвојувањето на Законот за енергетска ефикасност

Добивај вести на Viber

Собранието на Република Северна Македонија на последната седница го усвои Законот за енергетска ефикасност, подготвен од Министерството за енергетика, рударство и минерални суровини. 

- Со оваа одлука, земјата добива уште една силна законска рамка, усогласена со европските стандарди, која директно ќе придонесе за пониски сметки за граѓаните, почиста животна средина и отворање на нови зелени работни места.

Законот обезбедува суштински исчекор во намалување на потрошувачката на енергија, интеграција на обновливи извори и намалување на емисиите на стакленички гасови. Со неговото спроведување ќе се создаде стабилен систем кој ќе ја приближи земјата до европските климатски цели и до концептот на зелена транзиција - се нагласува во соопштението испратено од Министерството до медиумите. 

Од таму ги истакнвуаат клучните придобивки од овие закнски измени.

Клучни новини од Законот:

• Воведување на европскиот принцип „Енергетска ефикасност на прво место“.

• Долгорочна стратегија за реконструкција на станбени, јавни и комерцијални згради во енергетски ефикасни објекти.

• Тројно зголемена заштеда во јавниот сектор – задолжителна реконструкција на најмалку 3 отсто од јавните згради годишно.

• Задолжителни соларни колектори при изградба или реконструкција на училишта, градинки и јавни институции.

• Финансиска поддршка за инвестиции во соларни панели, геотермални системи и паметни технологии.

• Високи стандарди во јавните набавки, дигитална транспарентност и професионализација на енергетските контроли.

• Вклучување на сертификатите за енергетски карактеристики во Катастарот на недвижности и поттик за меѓуопштинска соработка.

- Со усвојувањето на овој закон се воспоставува правна, економска и социјална рамка што ги намалува трошоците за граѓаните и бизнисите, ја забрзува интеграцијата на обновливите извори и овозможува креирање на одржлив енергетски систем.

Министерството за енергетика, рударство и минерални суровини останува посветено на целосната реализација на реформите во енергетскиот сектор и на усогласување со европското законодавство. Законот за енергетска ефикасност е дел од пакетот реформски закони кои го поставуваат темелот за стабилен, одржлив и конкурентен енергетски сектор – со енергетска сигурност, подобар квалитет на живот за граѓаните и забрзано приближување кон Европската Унија - се потенцира на крајот од соопштението.