Добивај вести на Viber
Три компании покажале интерес да ја градат новата фонтана на плоштадот Македонија, која треба да никне на просторо меќу Калениот мост и споменикот „Воин на коњ“. Според информациите од Град Скопје, понуда доставиле „Крин кг" од Прилеп, „Урбан инвест" и АД „Пелагонија Гостивар", додека тендерска документација подигнале повеќе компании.
По доставувањето на комплетната документација Комисијата треба да направи проценка на понудите и да ги информира понудувачите за електронската аукција на која треба да се избере кој е најповолен понудувач. За еден месец треба да се знае кој ќе ја прави фонтаната.
Според најавите, новата фонтана ќе има форма на коцка со страни од по 15 метри. На неа ќе има 128 прскалки кои ќе работат во лето. Плочите од плоштадот пак кои ќе мора да се извадат, треба да бидат употребени за поплочување на плоштадот кај новата црква „Пресвета Богородица" во Центар, најавија од Град Скопје.
Проектот за изградба на фонтана и реконструкција на плоштадот, како што е наведено во соопштението, ќе се реализира со 2/3 финансиски средства од Владата на Република Македонија и 1/3 од буџетот на градот Скопје.