Поплавени 300 куќи во Кумановско, одронет патот до село Соколарци, Кочанско

Добивај вести на Viber

Поради обилните дождови во Кумановско, се зголеми нивото на реките Кумановка и Којнарка и се излеаа од речните корита предизвикувајќи штети на најмалку 300 куќи во повеќе населби. Најкритично, според првичните информации, е во населбата Долно Коњаре долж улицата „Никола Тесла“, населбата Средорек каде се зафатени околу 200 куќи, како и куќите и објектите кон месноста „Митев Мост“ и на потегот кон селата Доброшане и Шупли Камен. Регионалниот Центар за управување со кризи информира дека во кумановско наврнале 44 литри дожд на метар квадратен. „Во населбата Средорек, околу 100 куќи се поплавени и дел од населението треба да се евакуира“, изјави Џеват Демировиќ, претседател на месната заедница Средорек. Штети се предизвикани на куќи и помошни објекти. Жителите од овие населби велат дека водата надошла околу два часот по полноќ. „Евакуирани се 20 семејства синоќа доцна во ноќта. Во тек е состанок, а веќе од утре граѓаните кои претпрпеа штета ќе може да поднесат пријави за обесштетување“, информира Зоран Павловски претседател на штабот за заштита и спасување. Во исто време, поројниот дожд и надојдените води однесоа дел од патот кај селото Соколарци, Кочанско во должина од стотина метри и длабочина од околу пет метри. Однесен е асвалтниот коловоз и направени се големи влдлабнатини на патот кој е во прекин. Како што соопштуваат од Макеоднија пат секција Кочани, од предпладнево сообраќајот е пренасочен кон село Чешиново, односно Спанчево и Облешево. На лице место излегоа надлежните органи и се прават напори за санирање на коловозната лента и нејзино оспособување за сообраќај.