Поплави низ Македонија: Струмица под вода, политиката на мегдан!

Добивај вести на Viber

Поројните дождови и врнежите од град го потопија струмичкиот регион. Голем број домови и обработливо земјоделско земјиште беа поплавени, а водата однесе и четири моста во струмичките села, додека целосно е прекинат сообраќајот кај месноста Три реки -Рич, каде што мостот беше однесен од надојдените води. Поплави  има и во Валандово, Гевгелија, Радовиш, а врнежите ја заматија и водата за пиење во Тиквешијата. Поголеми поплави исто така беа забележани и на неколку улици во Тетово, за кои се претпоставува дека немале соодветна атмосферска канализација.Пелагонија пак беше зафатена од  интензивни врнежи од град. Сепак, најлошо мина југоисточниот дел од државата, односно реонот на Струмица. Како што соопштија од Дирекцијата за заштита и спасување врнежите од дожд предизвикале поплавување  на станбени и деловни објекти, а излеаните води од реките Радовишка и Водочница поплавиле  над 1.500 хектари обработливи површини. Од Дирекцијата исто така биле обезбедени три илјади вреќи со песок за правење насип на критичните точки, како и пумпи за исцрпување на водата. Ангажирана е и градежна механизација за правење насипи на речните корита. Денеска дел од поплавените подрачја ги посети министерот за транспорт и врски Миле Јанакиески кој посочи дека се преземени мерки за ублажување на последиците. „Ја увидов состојбата на терен. На овие локации веќе е интервенирано, но ние постојано соработуваме со општините со цел да ги намалиме последиците од надојдените води и да ја санираме состојбата“, истакна Јанакиески. И поплавите можност за политички препукувања  Од општинскиот комитет на ВМРО ДПМНЕ го обвинија струмичкиот градоначалник Зоран Заев дека не презел никакви мерки за решавање на проблемот со поплавите во Струмичко. Оттаму посочија дека ситуацијата ескалирала поради неисчистените шахти и нерешавањето на одводниот канал во Струмица. „Уште ноќеска бевме на терен заедно со кризниот штаб за да ја следиме ситуацијата со излевањата, но не можеше да се контролира штетата настаната поради тоа што Владата не ги исчисти навреме речните корита околу Струмица“, одговори Заев на ваквите обвинувања. Тој обвини дека најголем проблем за поплавите биле затрупаните корита на реките Струмица, Водочница, Крива река и Моноспитовски канал и праша чија должност е нивното чистење и одржување. „Што се однесува пак до каналите кои се во надлежност на општина Струмица,  каналот на ул. Крушевска република и Светиилијски порој, тие и покрај поројниот дожд не се излија, што докажува дека истите редовно се чистат и одржуваат“, одговорија од општината.