Потпишан договор за регулирање на правата на работниците во енергетиката

Добивај вести на Viber

Самостојниот синдикат на работниците од енергетиката и стопанството и Здружението на работодавачи од енергетиката денеска го потпишаа колективниот договор за регулирање на правата и обврските во оваа област. Целта на договорот е да се применат меѓународните работни стандарди, да се изедначат условите за работа на ниво на гранка и да се утврди одредена рамка на права кои треба да им се овозможат на вработените. „Цврсто стоиме на констатацијата дека вистинскиот социјален дијалог нема алтернатива и само преку негов континуитет, сите отворени прашања можат квалитетно и долгорочно да се решаваат“, изјави Вернер Хенгст, претседател на Здружението за енергетика при Организацијата на работодавачи на Македонија. Според претседателот на Самостојниот синдикат на работниците од енергетиката Роберт Симоноски ова е историски момент кога првпат со колективен договор се верификуваат правата на работниците во сите енергетски компании од приватниот сектор и се регулираат односите во енергетиката во време кога тоа е најпотребно за сигурноста на работните места и условите за работа.