Повеќе проекти за подобра и помодерна патна инфраструктура

Добивај вести на Viber

Поголем број проекти со кои ќе се подобрува патната инфраструктура во земјава, што е клучно за ефикасност на бизнис заедницата, па затоа е потребно Македонија да се прилагоди на новите состојби и да не настапува со проекти што биле атрактивни пред дваесетина години. Ова го истакна професорот  Вулнет Палоши, по завршување на денешната прес конференција “Конективна Европа- одговор од ЦЕФТА регионот“, што се одржа денеска во Скопје по иницијатива на Стопанската комора на Македонија. -Не треба да останеме на некои проекти што се долгорочни,  а за  чија реализација се променија многу услови во регионот. Македонија уште тапка со тие идеи, а во опкружувањето се случија многу работи. Мора да се прилагодиме на новонастанатите  состојби во интегрираната сообраќајна мрежа“, рече Палоши, предлагајќи на просторниот план на Македонија  да се направат дополнувања со краткорочни решенија кои во период  од пет до десет години би фатиле чекор со функционалните транспортни мрежи. -Коридорот 8 што беше интересен за градба пред десет години, денес веќе не е интересен и концесионерите не се јавуваат. За Коридорот 8 се потребни нови решенија со други варијанти, како проширување со трета или четврта лента, а не автопатско решение што било интересно пред десетина години“, рече тој. Тобијас Бауман од Германската трговска комора, потенцира дека квалитетната инфраструктура  е многу важна за германските и за останатите инвеститори. Меѓу најважните проекти за Македонија е довршувањето на автопатската мрежа на Коридорот 10, изјави Мартин Клауке, раководител на Оддел за оперативни работи при делегацијата на ЕУ. Тој  најави дека ЕУ, ќе продолжи со поддршка на проекти преку ИПА, а веќе се користат 130 милиони евра за различни проекти претежно во областа на железничкиот и патниот сообраќај за коридорите 8 и 10. -Моментно се подготвува Инструментот за предпристапна помош за периодот од 2014 до 2020, кој ќе опфаќа сличен износ на средства. Се уште ги немаме точните бројки, но ќе продолжиме да ја поддржуваме патната инфраструктура. Можеби ќе се смени  малку  фокусот на нашите системи и ќе ги поддржуваме поголемите проекти како коридорите 8 и 10, со поголема поддршка на инвестициската рамка на Западен Балкан и ќе има поактивно мешање на нашите фондови со националниот буџет и со останати средства од меѓународни институции. Ќе се стави поголем акцент и на инфраструктурата на локално и регионално ниво“,  рече Клауке.