ПОВЕЌЕ ОДБИЕНИ ОТКОЛКУ ОДОБРЕНИ БАРАЊА: Владата „филтрира“ кои компании може да инвестираат во енергетскиот сектор

Добивај вести на Viber

Со усвојувањето на новиот Закон за енергетика се зголеми и полето на активности на Владата изминатите месеци. Сега со доделени овластувања ги одобрува, односно не ги одобрува големите енергетски проекти за производство на електрична енергија од обновливи извори со над 10 мегавати моќност.

Владата има формирано посебна комисија која треба да стави ред во хаотичното инвестирање во последно време, особено кај фотоволтаичните централи за кои има особено голем интерес од странски инвеститори, а познавачите велат овластувањата кои сега се доделуваат се практично еден вид „градежна дозвола“. Дури евентуално потоа, инвестицијата би можела да добие лиценца за отпочнување со производството од Регулаторната комисија за енергетика.

Според евиденцијата на „Фактор“,повеќе барања за навидум амбициозни планови се одбиени, отколку оние што добиле позитивна одлука. Само шест проекти добиле овластување, а еден од нив е и оној на Инвалл Мак, која кај Штип го гради големиот ветерен парк на инвестицискиот фонд „Алказар“ со голема поддршка од новата власт.

Одбиен поради недоставена потребна документација е М Енерџи Гроуп Ник, фирма поврзана со Вице Заев, братот на поранешниот премиер Зоран Заев, чие барање за овластување било поднесено од февруари лани. Вториот проект на оваа компанија познат како „ФЕЦ Сушево 2“ од 30 мегавати во Штип сепак бил прифатен од Владата.

Одбиени се и барањата на израелските инвеститори ДАМ Енерџи, а поради недоставена документација бил одбиен и турскиот „Еуроеса Енерџи“ кој сакал да гради две фотоцентрали од 36 и 11 мегавати.

Во текот на летово што изминува пред владиниот „филтер“ не поминал ниту амбициозниот проект на израелскиот инвеститор Биг Мега Солар Оне. Не е прифатено барањето ниту на МИТ Солар на косовскиот бизнисмен Саит Вокши поради тоа што не станувало за една голема фотоцентрала, туку три помали. Не е прифатена ниту замислата на ФЕЦ Димонце на познатиот штипски бизнисмен Марјан Јовчевски, инаку сопственик на Јофатекс, кој исто така го цепкал проектот на повеќе централи.

Државниот завод за ревизија минатата недела го објави ревизорскиот извештај за енергетската транзиција, во кој се забележува дека претходно од 2011 до 2023 биле овластени позитивно сите осум барања, меѓу кои и тие на најголемите фотоцентрали во моментов во земјава на Меј Енерџи,Фортис Енергетика, ОСМ Солар и новиот ветерен парк Богословец.

А.К.