Ќе се реконструира Универзалната сала - колку пари доби Град Скопје?

Добивај вести на Viber

Владата му додели средства на Град Скопје за Универзалната сала.

Во согласност со програмата на Владата за капитални дотации во локалната самоуправа во областа на културата за 2019 година, на Град Скопје му се доделени 30 милиони денари за реконструкција на Универзална сала.

Во мај лани градоначалникот на Скопје, Петре Шилегов и тогашниот министер за култура, Роберт Алаѓозовски рекоа дека на Скопје ќе му ја вратат Универзалната сала. Тие потпишаа писмо за намери со кои се дефинираа активностите на унапредување на културата на подрачјето на Град Скопје.

Градоначалникот Шилегов, инаку вети стартување на процесот на изградба на Универзална сала веднаш по добивање на градоначалничкиот мандат уште во време на предизборието за локалните избори во октомври 2017.

Владата неодамна ја усвои програмата за реализација на средствата предвидени во буџетот на Министерството за култура за 2019 година за капитални инвестиции во единиците на локалната самоуправа.

Програмата е со буџет од 117,5 милиони денари, и, меѓу другото, ќе бидат алоцирани во проектите како што се Реконструкција со доградба и надградба на конгресен центар Универзална сала – Скопје, изградба на Спомен обележјето на Тоше Проески, изградба на Дом на култура во Општина Боговиње, реконструкција и адаптација на културен „Шота“ во селото Неготино, Општина Врапчиште, за ентериерно уредување на објект киното „Манаки“ во Битола, и други капитални проекти во културата во единиците на локалната самоуправа.