Пратениците одлучија – со кредит од Кина ќе се градат автопатите Скопје – Штип и Кичево – Охрид

Добивај вести на Viber

Македонските пратенци со  66 гласа „за“, еден „против“ и ниту еден „воздржан“вечерва во рамки го изгласаа Законот за реализација на инфраструктурни проекти за изградба на  автопатските делници  Миладиновци-Штип и Кичево-Охрид. Според најавите од владата изградбата на новите автопати на овие делници треба да се реализира со кредит преку кинеската Ексим банка, со рок на отплата од 20 години, пет години грејс период и каматна стапка од 2 процентни поени. Автопатот кој ќе започне со изградба на делница Скопје – Свети николе – Штип ќе чини 206 милиони евра,  а автопатот на делницата Кичево-Охрид  е вреден 374 милиони евра. Во договорт има и одредба со која се предвидени десет проценти за дополнителни непредвидени работи. Автопатот Скопје-Штип треба да  биде во должина од 53 километри со широчина од 29 метри со по две коловозни ленти од двете страни и една дополнителна лента за застанување. Рокот за изградба на автопатот  е три години. Автопатот кој ќе се гради на делницата Кичево-Охрид, е во должина од 56,7 километри, ширина од 27,5 метри и треба да биде изграден за 45 месеци.  Проектото за изградба на автопатите со десет отсто до сумата ќе биде финансиран од Владата на Р.М., а останатите 90 0тсто до пари од кредит од Ексим банка. Патиштата треба да овозможат полесно поврзување на целата држава и да дадат поддршка на локалниот економски развој, и пред се полесно патување за граѓаните до центарот на градот и до главните туристички центри пред се до Охрид и се што значи поврзана индустрија со оваа автопатна инфраструктура. Главниот изведувач на градежните работи ќе биде должен да ангажира подизведувачи од Македонија за најмалку 49 проценти од предвидените работи, а исто така и да набави најмалку 49 проценти градежни материјали од Македонија. Изведувачот и подизведувачот во тек на изградбата треба да ангажираат минимум 51 процент македонски државјани. Пратениците од опозициската СДСМ  во текот на расправата се изјаснија дека ќе гласаат за законот и оти генерално даваат поддршка за изградбата на патиштата, но  ги критикуваа цените за изградба на километар автопат  и според нив, поволностите дадени за компаниите кои ќе ги градат. Обвинија за можности за корупција во целиот проект, и оти Владата неколкупати нелогично го зголемила износот на инвестицијата за автопатиштата. Во краток период, тврдат, имало нелогично зголемување на цените за изградбата. -  Досега можевме да имаме изградено барем дел од овие автопати наместо проектот Скопје 2014. Цената која се става во овие предлог закони навистина е многу повисока од реалната цена за она што ќе го добиеме како држава, рече во попладневниот дел од расправата пратеникот од СДСМ Панче Орцев. Во реплика министерот за транспорт и врски Миле Јанакиески детално ги претстави сите трошоци за предвидените активности во изградбата и укажа и дека во меѓувреме се зголемиле цените на основните материјали за изградба на автопатите. -   Цената што е понудена од концесионерот е реална цена согласно цените во 2013 година, а многу тешко може да се споредува со нешто што се случувало во 2008 година, наведе министерот Јанакиески. Според Илија Димовски од ВМРО-ДПМНЕ, и покрај тоа што изградбата ќе ја подобри состојбата со патиштата во државата, неразбирлив е односот на СДСМ кон проектот со обвинувања за корупција и за износот на цената за километар автопат. - Обвинувате за корупција. Законот и договорот се поставени така што ниту еден долар од Ексим банката нема да дојде на ниту една сметка на државна институција. Плаќањето ќе се извршува директно од банката на фирмата изведувач. Кога обвинувате за корупција го вперувате прстот кон банката или изведувачот, што не е сериозно, рече Димовски. Во Собранието во тек е расправа за Предлог-закон за гаранција на Република Македонија на обврските по договор на заем на проектот за изградба на автопат делница Кичево-Охрид кој што се склучи меѓу Експрот импорт банката на Кина и Јавното претпријатие за државни патишта, по скратена постапка второ и трето читање.