Празни полици и драстични мерки поради коронавирусот: Македонци од Минхен со сведоштва за Фактор

Добивај вести на Viber

Уште пред еден месец Германците почнаа поради коронавирусот да прават залихи од некои намирници. Денес тие слики, кои се забележливи и кај нас но и ширум Европа, се повеќе се гледаат и таму. Дел од граѓаните сами коментираат дека таквото однесување во купувањето, посебно на храна и конзервирана храна е забележливо, не во целата земја, но сигурно ширум неа.

Фактор контактираше наши државјани кои живеат неколку години во Минхен. Тие раскажуваат за моментната ситуација таму.

-Од пред два дена социјалниот живот е ограничен. Затворено е веќе се. Музеи, кината, театри а вработените делумно се ослободени до 20 април. Затворени се и спортските објекти, фитнес клубови, обложувалници и бордели. Забраната важи и за верските собири. Се затвораат и детските игралишта. Во дел од пекарите работното време е намалено, продавниците кои не продаваат прехрамбена храна се затвораат а рестораните ќе работат со скратено време. Во болниците засега нема промени во полето на работни часови-ракажуваат нашите соговорници.

Меркел во понеделникот вечерта вонредно и се обрати на нацијата и ги претстави новите пакет мерки за спречување на ширењето на коронавирусот. Канцеларката најави дека граѓаните не би требало и да патуваат.

-Да токму така, Меркел рече дека во овие моменти е најдобро да не се патува ниту да се оди на одмор, како внатре така и надвор од Германија, а рестораните може да бидат отворени само од 6 до 18 часот со задолжително придржување до максимален број на гости и растојание меѓу масите-велат за Фактор Македонци од Минхен.

Нашите соговорници раскажуваат дека голема паника нема, но залихи се купуваат посебно тоалетна хартија.

-И покрај големиот број на случаи на заразени со коронавирусот кој расте од час во час не се чувствува преголема паника. Некои сериозно ја сфатија ситуацијата, а други пак не. Продолжуваат да излегуваат, да се собираат како да им е сеедно. Додека пак има и такви кои сметаме дека треба да се заштитиме на време и да бидеме посериозни. Кај нас на работа во болницата каде што нашата фирма испраќа работници да чистат, максимално гледаме да биде се под контрола, се бара голема чистота а вработените се заштитени и опремени соодветно-велат нашите соговорници додавајќи дека и полиците во маркетите се празнат постојано а се купуваат основни намирници за по дома.

-Се купуваат намирници кои имаат подолг рок на траење, храна во конзерви и тестенини. По неколку дена не можеме да начекаме да купиме тоалетна хартија и средства за дезинфекција на раце. Зошто толку акцентот е ставен токму на тоалетната хартија навистина не знаеме и не можеме да разбереме. Сликите кои се споделуваат на социјалните мрежи во голем дел се вистински. Дека се купува тоалетна хартија ко лудо навистина се купува-ни раскажуваат.

Мерките во Германија ќе важат на „одредено време“ а властите таму најавија дека ќе го контролираат нивното спроведување.

Од забрана за работа, исклучоци има кај самопослуги, аптеки, продавници за пијалок, дрогерии, пет шоп продавници и цетри за продажба на градежни материјали и домашни намирници. Од забрана се изземени и фризерите а целта на Меркел наводно е одржување на животот „во најголема можна мера“.

Ирена Ставрова