Преку Битола со воз до Грција!

Добивај вести на Viber

Се најавува ново железничко поврзување преку граничниот премин Кременица по Битола, завршувањето на Коридорот 10 и отворање заеднички простор за преземање на возовите од грчка и македонска страна. Ова беа дел од темите на кои разговарале директорот на  МЖ –Инфраструктура  Ирфан Асани и грчкиот колега Панајотис Теофанопулос. Прв пат по две децении најавуваат интензивирање на соработката меѓу македонската и грчката железница, а наскоро ќе биде потпишан  меморандум за соработка меѓу двете претпријатија.

Двајцата директори разговарале и за повторно воведување на патничкиот воз до Солун, но било договорено дека прво мора да се утврди колку тоа е изплатливо.

Според директорот на Грчките железници, денешната средба меѓу раководствата на двете претпријатија е историска, а соработката меѓу железниците е важна за да има подобар и побезбеден железнички сообраќај.

„Треба да соработуваме затоа што само така ќе имаме побезбеден, подобар и поевтин железнички сообраќај. Сите пруги треба да се поврзани и да имаме еднакви стандарди. Не се работи за македонски, српски или грчки железници, туку за железница како целина во која треба да имаме побрз пренос на патници и стоки. Еден воз кога ќе тргне од Пиреа или Атина и ќе стигне во Германија, тогаш тој воз не е само грчки, туку на сите држави низ кои поминува“, забележа Теофанопулос.

Железничкиот сообраќај на Коридорот 10 е намален за три ипол пати во споредба со периодот пред економската криза, а една од причините поради која европските бизнисмени се повеќе ја заобиколуваат Македонија, според директорот Асани, е лошата железничка инфраструктура.