Преку иновативен и револуционерен маркетинг до успех во бизнисот

Добивај вести на Viber

Како до иновативен и револуционерен маркетинг - ова беше темата на предавањето во Стопанската комора на Македонија наменето за нејзините членки, а со цел стопанствениците да ги согледаат глобалните иновативни технологии за продажба, но и да стекнат дополнителни знаења од врвни експерти. Предавач денеска беше Виторио де Педис (Vittorio de Pedys), професор на ESCP-EAP Европската школа за менаџмент во Торино кој смета дека иновациите се многу најважни за производството, но огромна улога игра и маркетингот. За висок пазарен ефект треба  да се создаде иновативен производ наменет за потребите на потрошувачите, смета Де Педис, кој го објаснуваше најновиот Харвард модел на револуционерен маркетинг. Тој ги доближи најновите трендови во маркетингот, употребата на нови технологии при создавањето на креативни и иновативни маркетинг-кампањи.Особено внимание се посвети на иновативноста и револуционерноста во маркетингот, две основни алатки за компаниите кои треба да ги инкорпорираат во своето работење со цел да опстојат на турбулентниот пазар. Настанот беше отворен од Антони Пешев, претседавач на Собранието на Стопанската комора на Македонија. Од Стопанската комора на Македонија му беше доделена благодарница на Педис за неговиот придонес во пренесување на знаење, а преку тоа и на еден начин подобрување на бизнис-климата во Македонија.