Премиерот му порача на Груевски да се врати дома
Објавено во: Македонија 31 Јули, 2019
Премиерот Зоран Заев денеска го повика екс премиерот, Никола Груевски кој доби политички азил во Унгарија, да се врати во Македонија, затоа што и одлежувањето на казна затвор е помош.
„Мора да дојде. Нека дојде. Треба помош во државата. Помош во државата е и кога ќе си ја реализирате казната. Сѐ е помош. Сите испраќаме порака на одговорност со сѐ, заради тоа можам да испратам навистина двосмислена порака – нека се врати дома“, вели Заев.
Премиерот ја коментираше и средбата на првиот човек на ВМРО-ДПМНЕ, Христијан Мицкоски, со унгарскиот премиер Виктор Орбан.
„Мислам дека тие се сретнаа како двајца лидери на европски народни партии. Јас верувам дека таа средба може да придонесе за зајакнување на пријателството меѓу Република Северна Македонија и Унгарија“ – истакна Заев.
Инаку, Груевски на Фејсбук напиша дека поради состојбите во државата му доаѓало да дојде и да помогне.