Пресечен е меѓународен канал за транспорт на дрога од Албанија вредна околу 300.000 евра

Добивај вести на Viber

Од полицијата соопштија дека е пресечен меѓународен канал за транспорт на дрога од Албанија вредна околу 300.000 евра. 

Полицајци од Бирото за јавна безбедност, поточно Одделот за криминалистичка полиција – Сектор за недозволена трговија со дрога, оружје и опасни материи денеска заедно со САЕ „Тигар“, Одделот за сузбивање на организиран и сериозен криминал и СВР Охрид го уапсија З.С.(57) од Охрид, со што успешно е пресечен уште еден меѓународен канал за транспорт на дрога од Албанија во Македонија во вкупна вредност од околу 300.000 евра.

З.С., управувајќи автомобил „мерцедес“, со охридски регистарски ознаки, се упатил во селото Љубаништа, охридско, со намера да изврши неовластено пренесување на дрога и во близина на место викано „Ушине“ од албански државјани преземал пет големи платнени торби во кои имало марихуана во различни пакувања, во вкупна количина од околу 100 килограми.

По ова З.С. се упатил по регионалниот пат Св.Наум кон Охрид, со намера дрогата  неовластено да ја пренесе од Охрид за Скопје и поради финансиски долг да ја предаде на купувачи. Во 04.30 часот полицајци го запреле возилото и при извршен преглед дрогата е пронајдена и одземена. 

Во координација со Јавен обвинител, СВР Охрид поднесе кривична пријава до ОЈО Охрид против З.С. од Охрид, поради постоење  основано сомневање дека сторил кривично дело „неовластено производство и пуштање во промет на наркотични дроги, психотропни супстанции и прекурсори“, казниво по чл.215 ст.1  од Кривичниот законик.