Претседателот и премиерот на Црна Гора заработија кривични пријави

Добивај вести на Viber

Потпретседателот на црногорскиот Парламент Бранко Радуловиќ објави дека до државниот обвинител поднел кривична пријава за 32 лица, меѓу кои и против претседателот и премиерот на Црна Гора - Филип Вујановиќ и Мило Ѓукановиќ, затоа што се сомнева дека се одговорни за злоупотреби при приватизацијата на Комбинатот за алуминиум - Подгорица (КАП) со што направиле штета поголема од две милијарди евра. Бранко Радуловиќ, кој е функционер на опозицискиот Демократски фронт, навел дека пријавата ја поднел против поранешни и сегашни највисои државни функционери, директори на Комбинатот, универзитетски професори, бизнисмени, обвинители и судии. „Осомничените како соучесници, имајќи сознание за заедничко делување и преземајќи активности со кои се предизвикани штетни последици, договорно и смислено делувале со многу други лица и создале криминална организација“, се наведува во пријавата. Радуловиќ тврди дека со незаконити дејства на државата и е нанесена директна штета од повеќе од две милијарди евра, додека индиректната е значително поголема, а како главен креатор на противправните дејства го посочува премиерот Мило Ѓукановиќ. Пријавата го опфаќа периодот од 1990 до денес. КАП со години е голем проблем за црногорската економија. Долговите на компанијата достигнаа 10% од бруто општествениот производ, а државата ги плаќаше со банкарски гаранции и со субвенција на струјата за оваа компанија иако таа беше во приватна сопственост. На штетата што Комбинатот ја предизвикува на црногорската економија укажуваа и Европската комисија, Меѓународниот монетарен фонд и Светската банка, кои инсистираа државата да престане да и помага на фабриката за алуминиум. Минатата година црногорската Влада во КАП прогласи стечај и ја продаде фабриката на приватната компанија „Унипром“ од Никшиќ. Но, поранешниот владин партнер во Комбинатот, рускиот тајкун Олег Дерипаска и неговите компании ја тужат Црна Гора пред меѓународни судови и бараат отштета од повеќе стотици милиони евра.