Продадена парцелата во центарот на Прилеп за изградба на трговски

Добивај вести на Viber

Денеска на електронска аукција општина Прилеп ја продаде парцелата од 1.617 метри квадратни во центарот на градот кај неодамнешниот млечен пазар на која треба да се гради трговски центар.

Парцелата се продаде по 15.500 денари за метар квадратен што е седум пати повеќе од почетната сума, 2.300 денари за квадрат.

Според Одделението за урбанистичко планирање, договорот со купувачот ќе биде потпишан идната недела.

Од продажбата на парцелата во општинскиот буџет ќе се слеат околу 400.000 евра.

Како што изјави градоначалникот Марјан Ристески, трговскиот центар на два ката, со подземен простор за паркинг места, ќе ја раздвижи економијата во градот и ќе отвори нови работни места.

Јавното претпријатие „Пазари“ досегашниот млечен пазар ќе го оспособи во кругот на Градскиот пазар и ќе биде според сите стандарди.

Општината за електронско наддавање понуди и градежна парцела надвор од Прилеп, кај поранешната фарма „Џаферица, голема 27.000 метри квадратни за бензиска пумпа и други придружни услужни објекти. Површината предвидена за објекти е околу 9.000 метри квадратни. Почетната цена за наддавањето е 200 денари за квадрат. Пријавувањето е на 16 септември, а наддавањето ќе се одржи на 20 септември. Парцелата, освен на домашните, преку Агенцијата за странски инвестиции ќе им биде понудена и на странски компании.