„Продис“ ќе гради нов погон, најава за стотина нови вработувања

Добивај вести на Viber

Компанијата Продис ќе гради уште една фабрика во индустриската зона Бунарџик, најави денеска директорот Коста Димов, една година по изградбата на првиот погон. Новата инвестиција ќе чини 15 милиони евра од кои седум милиони за изградба на фабриката, а осум милиони евра за објектот за откуп и обработка. Според најавите, со ова бројката на вработени од 80 ќе порасне до 200 вработени. Со новиот објект, покрај чаеви, органска храна и хомеопатски препарати , се планира да почне производство и на природна козметика.Камен-темелникот ќе се става  во април идната година, а фабриката ќе биде готова до крајот на 2014 година. „Кон крајот на октомври акционерите врз основа на анализата на оствареното, плановите и условите на работење со помош на Владата и сите држани институции на Република Македонија, донесоа одлука „Продис“ да влезе во втората и третата фаза на фабриката. На тој начин ќе се заокружи целиот циклус на проектот кој го имаме планирано за поконкурентни висококвалитетни производи за сите пазари кои веќе се или ќе бидат освоени од „Продис“, рече Димов. Според најавите, ако сега само 10 до 15% од суровините кои ги користат се од Македонија, новиот погон  ќе има и откупен центар, па овој процент ќе расте. „Затоа влегуваме во третата фаза за да се почне со планско сеење, жнеење и одгледување на репроматеријалот во Република Македонија затоа што скоро целата наша држава е органска, односно имаме многу малку загадување. Сакаме во овој порцес да ги вклучиме сите луѓе кои имаат желба или веќе го работат тоа“, додаде Димов. Денеска во Градскиот трговски центар во Скопје беше отворена првата хомеопатска аптека на компанијата кој има 158 производи. Освен во земјава свои претставништва има во Русија, Украина, Австралија и Америка. Инаку „Продис“ е инвестиција на „Протек груп“, еден од најголемите руски фармацевтски групации.