ПРОНАЈДЕН НАВАЛНИ - Наводно се наоѓа во затвор на северот од Урал
Објавено во: Свет 25 Декември, 2023
Портпаролката на рускиот опозициски лидер Алексеј Навални, кој отслужува 30-годишна затворска казна, денеска соопшти дека е откриено каде се наоѓа.
„Го најдовме Навални. Тој е во Казнената колонија 3 (ИК-3), во населбата Карп, на северот на Урал, во автономниот регион Јамал-Ненец. Неговиот адвокат денеска го посети. Алексеј е добро“, објави портпаролката Кира Јармуш на платформата X (Твитер).
Адвокатот Иван Жданов рече дека ИК-3 е „една од најсеверните и најоддалечените“ затворски колонии во Русија.
„Условите таму се сурови, со посебен режим. Многу е тешко да се дојде до него и нема системи за доставување писма или јавување“, напиша Жданов на Икс, истакнувајќи дека еден од адвокатите денеска бил таму и го видел Навални, но не му било дозволено да влезе.
Spokesperson: Navalny found, meets with lawyers.
— The Kyiv Independent (@KyivIndependent) December 25, 2023
Russian opposition politician Alexei Navalny is "doing well" and has been located in a penal colony in Russia's Yamal-Nenets Autonomous District, spokesperson Kira Yarmysh wrote on X on Dec. 25.https://t.co/9C73Wca8mN
Жданов смета дека казнената колонија ИК-3 е однапред подготвена за доаѓањето на Навални и потсети дека таму во април бил директорот на Сојузната казнено-поправна служба Аркадиј Гостев и можно е, како што наведе, тогаш да одлучиле таму да го префрлат рускиот опозиционер.
„Ситуацијата на Алексеј е јасен пример за тоа како системот се однесува кон политичките затвореници, обидувајќи се да ги изолира и потисне. Благодарение на оние кои продолжуваат да пишуваат и шират информации за Алексеј и другите политички затвореници, ја продолжуваме борбата“, рече Жданов.
Тој ја поврза изолацијата на Навални со претседателските избори во Русија во 2024 година, на кои се очекува Путин да го освои петтиот мандат.
Пред две недели, соработниците на Навални објавија дека се загрижени, бидејќи долго време не го виделе или слушнале, а во затворот во Владимирската област, каде што Алексеј ја отслужувал казната, тој повеќе не се наоѓал на списокот на затвореници.
Фото: Принтскрин/Твитер