Пропадна проектот за пренос на азербејџански гас преку „Набуко“

Добивај вести на Viber

Азербејџанскиот конзорциум кој е одговорен за изворот на природен гас „Шах Дениз“ ја одби понуда да пренесува гас до Европа преку планираниот гасовод „Набуко“. Одбиената понуда ја дадоа група компании на чело со австриската ОМВ.

Австрискиот весник „Пресе“ се повикува на одлука на Конзорциумот кој управува со азербејџанското наоѓалиште „Шах Дениз“ со која тој се откажува од проектот „Набуко“ во прилог на конкурентскиот проект за Транс-јадрански гасовод (ТАП), кој минува преку Грција, Албанија и Италија.

Наоѓалиштето „Шах Дениз“се оценуваше како најважниот извор на гас во проектот „Набуко“.

Во конзорциумот на наоѓалиштето учествуваат компаниите „Бритиш петрол“ (БП), „Статоил“, „Тотал“, „Лукоил“, иранското нафтено здружение Ен-Ај-Оу-Си, турската ТПАО и азербејџанскиот енергетски гигант СОКАР. Неодамна „Бритиш петрол“ соопшти дека одлуката ќе биде објавена кон крајот на јуни 2013 година.

Акционери на  конзорциумот кој го поддржуваше проектот „Набуко“ се австриската О-Ем-Ви, унгарската ФГС, бугарскиот „Булгаргаз“, романскиот „Трансгаз“ и турскиот БОТАШ.

Според плановите, гасоводот Набуко-Запад треба да пренесува гас од бугарско-турската граница преку Бугарија, Романија и Унгарија до Австрија.

Проектот „Набуко“ требаше од крајот на 2017 година да пренесува гас до Европа од азербејџанското наоѓалиште „Шах Дениз“.