Пропадна уште еден тендер за Луна-паркот во Скопје

Добивај вести на Viber

Пропадна и третиот обид на Градот Скопје за воспоставување договор за јавно-приватно партнерство за изградба на нов Луна парк во Скопје. На денешното отворање на понудите беше констатирано дека не пристигнала ниту една понуда на инвеститор заинтересиран да го гради Луна-паркот. Од Градот  нема коментар дали и кога ќе се распишува нов тендер, но велат дека од идејата не се откажуваат.

„На јавниот повик за приватно јавно партнерство за изградба на нов Луна парк, кој заврши денеска, не се пријави ниту една фирма. Ова беше трет јавен повик за приватно-јавно партнерство. Градот Скопје и градоначалникот Коце Трајановски не се обесхрабрени од денешниот исход и не се откажуваат од проектот за целосно осовременување на забавниот парк, а за модалитетите на кој начин ќе биде реализирана идејата јавноста благовремено ќе биде информирана“, изјавија за Фактор од Градот Скопје.

Според критериумите предвидени во последниот оглас, Градот Скопје бараше приватен партнер за со кој ќе изгради модерен и забавен Луна-парк што ќе ги задоволи највисоките светски стандарди за ваков тип објекти. Инвеститорот би го добил забавниот парк под концесија во траење од 35 години. Од потенцијалниот инвеститор се бараше позитивно финансиско работење и најмалку шест милиони евра остварени вкупни приходи во последните три деловни години. Според критериумите за бодување, најмногу поени носеа цената на дневниот билет за влез и неограничено користење на реквизитите и рокот за изведба на забавниот парк, што е подготвен да го понуди инвеститорот. Инвестицијата во забавниот парк се проценува на околу осум милиони евра. Според условите во договорот, концесионерот е должен за дизајнот на Луна паркот, за финансирањето, изградбата, работата и одржувањето на модерниот забавен парк. Како би изгледал Луна паркот? Новиот забавен парк, како што го замислуваат градските власти, треба биде сместен на локацијата на сегашниот Луна Парк. Според истражувањето извршено во Студијата за изградба на нов забавен парк во Скопје на ИДОМ Консалтинг од Шпанија, се согледани можностите за  изградба на паркот на вкупна површина од 26.563 м2, со можност површината на локацијата на постоечкиот забавен парк да се зголеми и до 40.000 м2. На оваа површина би имало влез со соодветни придружни објекти, административни објекти, нови забавни реквизити за возење во согласност со Европските стандарди за безбедност, објекти за служење на храна и пијалоци, дел за продажба на сувенири, затворен дел за играње, паркинг простор, соодветна техничка инфраструктура, тематизација на паркот. Според образложението на Градот, инвестицијата се очекува да генерира зголемени приходи од работењето на забавниот парк со годишна посетеност од 200 илјади посетители, најмногу семејства и деца до 15 години. Ј.С.