Протече документ за набавката на модуларните болници, одговорноста тенденциозно му се наметнува на директорот Бесими
Објавено во: Македонија 21 Септември, 2021
Во одредени медиуми протече документот за јавната набавка на 17-те модуларни болници за ковид-пациенти склучен помеѓу Светска банка и Министерството за труд и социјална политика, а тенденцијата е одговорноста да се префрли на директорот на тетовската болница Флорин Бесими, кој поднесе оставка откако во Тетово изгореа 14 лица.
Според документацијата, наводно Министерството за труд и социјална политика заедно со претставници на Светска банка само го спроведувале договорот, а локалните власти и директори требало да го контролираат квалитетот и функционалноста.
Кога станува збор посебно за тетовската модуларна болница, Бесими фигурирал како изведувач во локалниот надзор. Од подготвителната фаза, па се до последната оперативна фаза, за контрола на изградбата, функционалноста и заштитните механизми во објектот надлежни се во различни сегменти општинските власти во Тетово или изведувачот-понудувач „Брако“.
Според медиумите до кои дошла документацијата, надлежни се претставници на општина Тетово, директорот на болницата во Тетово и комунални инспектори. Овие три ставки од оперативната фаза требало да бидат платени од буџетот на тетовската болница. Планот за одржување на инсталациите и менаџирањето на отпадот требало да се изготви пред пуштањето во употреба, а Планот за заштита од пожар требало да се реализира на почетокот на работата на болницата.
Кај другите модуларни болници, наведени во надзорот се само имињата на директор на локалната болница, или економскиот директор, а во еден случај главната медицинска сестра. Во два града, Штип и Велес, наведено е само „менаџер“.
Во документот требало да биде впишано и името на инженерот кој извршил надзор над завршената работа, но таа графа останала празна во сите модуларни болници. Во документите јасно се наведува дека во речиси сите фази од изградбата и контролата на објектите надлежни се локалните власти, тврдат категорично овие медиуми.