ПРОЗИВКИ НА ЈАВНА СЦЕНА МЕЃУ ПРЕМИЕРОТ И ШЕФОТ НА ДРЖАВАТА - има ли придобивки од Отворен Балкан

Претседателот на државата Стево Пендаровски синоќа, коментирајќи ги забелешките на премиерот Зоран Заев дека македонскиот претседател ги сменил ставовите за иницијативата „Отворен Балкан“, рече дека особено последниот пасос од соопштението на кабинетот на премиер „не личи на Заев“ и дека „се сомнева оти тоа му е сугерирано, а тој не посветил доволно внимание бидејќи е зафатен со примопредавање на функцијата“.

Ова следува откако Кабинетот на Заев даде изјава во која го критикува вчерашниот став на Пендаровски, искажан при вчерашната посета на Косово, дека иницијативата Отворен Балкан е „фалична бидејќи во неа не учествуваат сите шест држави од Западен Балкан“.

„Јас сум изненаден што Пендаровски ги промени своите ставови за оваа пред сѐ економска иницијатива, но нема да бидам изненаден кога повторно ќе се премисли за да даде поддршка во периодот што доаѓа, а во интерес на граѓаните, државата и регионот“, стоеше во изјавата на Заев.

На ова всушност реагираше шефот на државата.

„Се сомневам дека некој од неговите познати ПР советници или стратези му сугерирале да напише една таква небулоза во соопштението“, рече Пендаровски во емисијата Топ тема на Телма.

Од претседателскиот Кабинет претходно објаснија дека уште на првата средба во врска со Иницијативата било заеднички утврдено дека ако Иницијативата е некаков вид алтернатива на македонското членство во ЕУ тогаш таа не е прифатлива.

фото: МИА