ПРВ ПАТ ВО ИСТОРИЈАТА: Холандија произведе повеќе од 50 проценти од електричната енергија од обновливи извори
Објавено во: Економија 28 Септември, 2024
Холандија за прв пат произведе повеќе од 50 отсто од својата електрична енергија од обновливи извори, според сегашните податоци на холандската канцеларија за статистика (CBS).
Според извештајот, Холандија во првите шест месеци од оваа година произвела 32,3 милијарди киловат-часови електрична енергија од обновливи извори, што претставува 53 отсто од вкупното производство на електрична енергија во таа земја, пишува NL Times.
Производството на електрична енергија од енергијата на ветерот се зголеми за една третина на 17,4 милијарди киловат-часови, првенствено благодарение на офшор фармите со ветерници, а производството на сончева енергија на 11,7 милијарди киловат-часови, се додава во извештајот.
Спротивно на тоа, производството на електрична енергија од фосилни горива, особено производството на јаглен и природен гас, нагло опадна.
Потрошувачката на електрична енергија во Холандија се зголемила во првата половина на 2024 година за пет отсто на 55,8 милијарди киловат-часови, според CBS.