Прво решавање на старите проблеми – потоа развивање туризам во Охридскиот регион

Добивај вести на Viber

Туристичките работници од Охридско-струшкиот регион дојдоа до заклучок дека треба да им се понуват нови нешта на странските туристи. За време на  работилницата насловена „Идентификување на потенцијалните туристички продукти во општините Вевчани, Дебарца, Охрид и Струга“, за да може да се развива туризмот прво треба да се решат проблемите кои се провлекуваат со години. „Овој регион има голем потенцијал за развој на алтернативниот туризам и се надевам дека во рамки на започнатиот проект  ќе произлезат нови идеи кои во иднина ќе се реализираат. Но, за да можеме да зборуваме за било каков развој на туризам  мора да дојде до решавање на проблемите како што се комуналната хигиена, недостатокот од патокази, паркинг простор, како и проблемот со немањето на јавни тоалети. Ова се проблеми кои постојано се кажувале , но никако да се решат“ истакна Перо Јакимов од охридската туристичка агенција „Генералтурист 2000“. Присутните се согласија дека расте бројот на странски туристи во овој регион, но заклучија и дека само ако се работи организирано и се понуди интересен производ ќе се привлече вниманието на домашните и странски гости. Денешната работилница е прва активност  од прекуграничниот проект „Кон алтернативен туризам“, во организација на Македонската развојна фондација за претпријатија (МРФП), а се спроведува во партнерство со организацијата „Партнерс“ од Албанија и со поддршка од Локалната агенција за развој- Струга и е финансиски е поддржан од Европската унија. Проектот се реализира во општините Охрид, Дебрца, Вевчани и Струга, Поградец и Корча.