ПУЏДЕМОН РЕШИТЕЛЕН: Следните денови Каталонија прогласува независност
Објавено во: Свет 04 Октомври, 2017
Идните неколку дена ќе бидат клучни за судбината на Каталонија.
Претседателот на Каталонија, Карлес Пуџдемон во интервју за Би-Би-Си изјави дека Каталонија ќе прогласи независност во следните неколку денови. Тој вели дека за сега нема контакти помеѓу неговата администрација и централната Влада во Мадрид.
„Владата ќе дејствува на крајот на оваа недела или на почетокот на следната седмица“ - рече Пуџдемон.
Тој нагласи дека ако Мадрид се обиде да интервенира и да ја стави под контрола каталонската Влада тоа ќе биде „грешка што ќе смени се“.
Претходно шпанскиот крал Фелипе нагласи дека актуелната ситуација во Каталонија е „многу сериозна“ и дека каталонските лидери ги прекршиле законите на земјата и покажале „недозволиво отсуство на лојалност“.
Тој исто така, констатираше дека „неодговорното однесување“ на каталонските лидери може да ја изложи на ризик економската стабилност на земјата.
Во цела Каталонија вчера имаше протести поради полициското насилство за време на забранетиот референдум за независност.
Се бара Европска унија да интервенира во спорот помеѓу каталонските лидери и властите во Мадрид.
Во меѓувреме се отвораат прашањата за уште неколку области во Европа кои можат да побараат самостојност и да доведат до промена на границите.