Радев не се плаши од притисокот на Макрон, и не го интересираат рокови, туку резултати
Објавено во: Македонија 15 Декември, 2021
Претседателот на Бугарија, Румен Радев денеска изјави дека е задоволен што европските лидери „конечно разбрале каде е вистинскиот проблем со Северна Македонија“ и дека сите обиди да се изврши притисок врз Софија се контрапродуктивни.
„На сите европски совети – од мај, разговарав со секој европски лидер на тема РС Македонија. Сакам да им се заблагодарам, бидејќи по втор пат темата е надвор од дневен ред. Нашите партнери конечно разбраа каде е вистинскиот проблем. Проблемот длабоко влијае на основата на самата ЕУ – човековите права и недискриминацијата“, изјави Радев за бугарските медиуми во Брисел каде што учествува на шестиот самит на Источното партнерство и Европскиот совет.
Вели дека Софија ќе продолжи да ја брани својата позиција, не само историјата, посочувајќи дека главен приоритет е почитувањето на човековите права на луѓето со бугарски идентитет.
„Не даваме рокови. Овој процес не е воден од рокови, туку од резултати“, рече Радев.
Вели дека францускиот претседател Емануел Макрон јасно ја знае позицијата на Бугарија и затоа не очекува притисок.
„Имаме јасен договор. Со Франција мораме да ги решиме енергетските прашања“, додаде Радев.