Радев по осум години подготвен да ја посети Македонија

Добивај вести на Viber

Бугарскиот претседател Румен Радев по осум години би можел повторно да ја посети Македонија, рече тој пред бугарските медиуми пред средбата со македонската претседателка Гордана Сиљановска Давкова.

-Очекувам дека изразената желба за дијалог и разбирање од страна на претседателката Сиљановска Давкова ќе остане како доследна политика на владата на Северна Македонија. Ние строго ќе го следиме протоколот. Време е и за мојата официјална посета на Република Северна Македонија, посочи Радев.

На прашање дали веќе има таква покана, Радев одговори дека во врска со ова прашање ќе се разговара со претседателката на Северна Македонија.  Последен пат тој беше во Македонија во 2018 во дводневна посета.

Тој додаде дека треба да се засили економската соработка и дека очекува Скопје да ги исполни сите свои обврски.

Според Радев, Владата на Северна Македонија сè уште не ја напуштила изборната реторика. 

- Владата на Република Северна Македонија сè уште не ја напуштила изборната реторика. Потребно е да се вратиме во реалноста, Нашите односи ќе зависат од склучените договори, изјави Радев.

Сиљановска Давкова денеска (13.09.2024) ќе биде во посета на Софија, каде ќе присуствува на операта „Набуко“ од Џузепе Верди, во изведба на Националната опера и балет на нашата земја. Во рамки на посетата, Сиљановска Давкова во Софија ќе оствари средба и со претседателот на Бугарија, Румен Радев.

Во македонската делегација ќе биде министерот за надворешни работи и надворешна трговија Тимчо Муцунски и министерот за култура и туризам Зоран Љутков. 

Официјална потврда за средба на двата претседатели, стигна и од нивните кабинети. Посетата е дел од зајакнување на културната дипломатија меѓу двете земји, при што се истакнува значењето на културната размена како мост во меѓународните односи, се вели во соопштението на кабинетиот на Силјановска Давкова.

Односите меѓу Македонија и Бугарија се затегнати веќе подолго време поради блокадата што нѝ ја наметна соседната земја на евроинтеграцискиот пат. Сиљановска и Радев беа на 24 мај во Рим на чествувањето на споменот на „Свети Кирил и Методиј“ но тогаш немаа средба иако македонската страна ја очекуваше.