РАДЕВ ПО ПОСЕТАТА НА ПЕТКОВ: Бугарите да влезат во македонскиот Устав па да ги одблокираме преговорите
Објавено во: Македонија 20 Јануари, 2022
Секој чекор што ја продлабочува нашата соработка мора да биде поддржан. Има многу позитивни сигнали од оваа посета, изјави претседателот Румен Радев запрашан како ја коментира посетата на премиерот Кирил Петков на Северна Македонија, пренесува БТА.
„Се надевам, сепак, како што кажав вчера од собраниската говорница, заедно со сите напори за подобрување на соработката, инвестициите, економијата, да не ги заборавиме клучните прашања што треба да се решат и всушност ќе ја отклучат вратата за почеток на преговорите“, рече претседателот Радев.
Агенцијата, исто така, известува дека шефот на државата го повторил вклучувањето на македонските Бугари во Уставот заедно со другите националности како заштита на нивните права и овозможување нивна целосна интеграција во културниот, економскиот и политичкиот живот на земјата, како и ставање крај на говорот на омраза и какви било зафати врз бугарската историја и култура.
„Се надевам дека државниот врв на (Република Северна Македонија) ќе покаже мудрост и политичка храброст што е можно поскоро да ги реши овие проблеми, особено со правата на македонските Бугари, за да можеме навистина да започнеме со градење на полноправни односи и да ја отвориме вратата за почеток на преговорите за членство. Како одговорна членка на ЕУ, мораме да интегрираме партнери, а не проблеми, додаде тој.