Роуд шоу и во Хамбург, уште германски инвестиции во Македонија?

Добивај вести на Viber

Македонската владина делегација денеска во Хамбург се сретна со германските бизнисмени каде беа презентирани инвестициските можности што земјава ги нуди за странските инвеститори.

Како што истакна потпретседателот на Хамбуршката стопанска комора Јенс Петер Брајтенгрос, Геманците треба да ги искористат можностите за инвестирање во Македонија.

„Вложени се огромни напори во инфраструктурата, да се генерира економски развој и да се привлечат странски инвестиции. Како резултат на добрата монетарна политика и врзувањето на вашата валута со еврото, економскиот раст повторно се зголеми за околу 3 проценти во 2010 и 2011 година“, изјави Брајтенгрос.

На бизнис форумот со претставниците на фармацевската индустрија, градежништвото, прехранбената индустрија и енергетиката во Хамбург присуствуваа македонскиот премиер Никола Груевски кој допатува од Литванија, како и вицепремиерот Владимир Пешевски кој вчера ловеше француски инвеститори во Париз.

За Груевски, германските инвеститори имаат добри искуства при инвестирањето во Македонија.

„Искуствата од инвестициите на „Кромберт и Шуберт“ и „Дрекслмајер“, се исклучително поволни, а нивните бизнис планови се насочени кон проширување на нивните капацитети што е доказ за поволната бизнис клима која Владата ја создава на планот на инвестициските можности”, рече Груевски.

Груевски уште еднаш повтори дека Македонија е рај за инвестититорите, додека вицепремиерот Пешевски се осврна на реформите за намалување на процедурите за водење на бизнис и инвестициите во образованието со кои се создава образована работна сила.

Пешевски истакна дека се намалени  административните процедури за водење бизнис, што треба да биде добар показател зе странските инвеститори.