РУСИЈА ВНИМАТЕЛНО го следи снабдувањето со енергија по кризата во Турција

Добивај вести на Viber

Во повеќето коментари посветени на неуспешниот обид за државен удар во Анкара, Москва и придава приоритет на енергетската безбедност. Русија го следи режимот на преминувањето на танкерите со нафта и други стратешки суровини и стоки преку Босфорот.

Енергетските стручни кругови во Москва направија заедничка проценка дека преку Босфорот поминуваат околу 3 милиони барели нафта дневно, а Русија има значителна заслуга за тоа.

Затоа 12 часовно затворање на Проливите во Москва се набљудуваше доста внимателно и претпазливо. Лично министерот за енергетика Александар Новак коментира дека засега официјално неговата земја не работела на обезбедување на алтернативни правци во такви околности.

Првиот лет од Истанбул до Москва беше спроведен рано утринава, иако Русија воведе забрана на воздушните пораки со Турција, во согласност со одредбите на претседателот Владимир Путин за обезбедување на безбедноста на руските граѓани кои во моментов се наоѓаат таму.

Повеќе од 150 руски туристи од почетокот на бунтот во Турција не можат да се вратат во својата земја, а општи проценки велат дека таму се наоѓаат малку над 4 илјади Руски државјани. Москва соопшти дека тие ќе бидат прибрани со специјални летови.

Според повеќето експерти она што се случило нема да влијае врз билатералните односи, освен дека тензиите ќе се задржат внатре во турското општество.

Постојат проценки дека е можно да бидеме сведоци на нов удар до година-две, бидејќи Турција се наоѓа во ќорсокак поради новата нејзина надворешна политика, која предизвикува конфликти. Како ризик се посочуваат процесите во Средна Азија при едно слабеење на Турција.

Пред московското издание "Комерсант" Руслан Пухов, директор на Центарот за анализи на стратегии и технологии, и коавтор на претстојната книга "Турската воена машина: сила и слабост", ги определува настаните како сигнал дека Турција отпаѓа од "големата игра" како геополитички играч . За Москва е важно регионалната димензија на обидот за државен удар во постсоветскиот простор и особено во Средна Азија, каде Анкара во последните повеќе од 20 години гради блиски односи со новите земји и поранешни републики од поранешниот Советски Сојуз, како и во Кавказ, каде што има сериозни процеси на тензии меѓу кои Нагорнокарабхскиот конфликт зазема значајно место, а Турција има влијание врз една од страните во него - Азербејџан.