РУСКИОТ ПРОЕКТИЛ ТРИ МИНУТИ ЛЕТАЛ НАД ПОЛСКА: Патувал 40-ина километри низ полскиот воздушен простор

Добивај вести на Viber

Руски проектил влегол во Полска на речиси три минути, пред да сврти кон украинскиот воздушен простор. Генералот Вјеслав Кукула изјави дека еден од проектилите лансирани од Русија вчера патувал 40-ина километри низ полскиот воздушен простор. Нема извештаи дека се случила експлозија.

Тревогата се совпадна со она што Украина го нарече најголемиот руски ракетен напад од почетокот на војната. Полскиот претседател Анджеј Дуда свика состанок на националниот совет за безбедност откако проектилот е детектиран. 

Портпаролот на полската војска Јацек Горишевски изјави дека неидентификуван предмет влегол во земјата од Украина кај пограничниот град Замоск во југоисточниот регион Лублин. Тој кажа дека тоа можеби има врска со големиот руски воздушен напад на Украина. Најмалку 30 луѓе загинаа во вчерашните напади на Украина, кога цел беше и Лавов, најблискиот украински град до Лублин.

Полската влада не ја исклучи можноста да се работи за руска провокација.

„Треба да испитаме дали ова беше провокација или тест на нашата реакција“, изјави полскиот заменик-министер за одбрана Станислав Вжјатек.

Од почетокот на руската инвазија, три странски проектили влегле во Полска, а во најтешкиот инцидент во ноември 2022 загинаа двајца полски фармери кога проектил падна во село близу украинската граница. Руската инвазија на Украина почна лани на 2 февруари. 

Фото: АП