САКААТ ДА ПРОИЗВЕДУВААТ ПОВЕЌЕ МУНИЦИЈА И ВОЕНИ ВОЗИЛА: Зеленски од Вашингтон предложи создавање европски одбранбен центар во Украина
Објавено во: Свет 12 Декември, 2023
Украинскиот претседател Володимир Зеленски од Вашингтон предложи создавање европски одбранбен центар во Украина.
Зеленски утрово на мрежата Икс наведе дека на состанокот со лидерите на американските одбранбени компании го претставил предлогот за формирање на европски одбранбен центар во неговата земја што ќе го забрза и зголеми производството на воена опрема и муниција.
„Се сретнав со лидерите на американските одбранбени компании и изразив благодарност до секој американски работник кој произведува оружје што ни помага да ги заштитиме нашиот народ и нашата земја. Исто така, предложив формирање на европски одбранбен центар во Украина. Подготвени сме да ги донесеме сите суштински одлуки, да ја намалиме бирократијата и да дистрибуираме нарачки. Подготвени сме да произведеме повеќе муниција и воени возила, но ни треба поддршка. Важно е да се развие заедничко производство на артилериска муниција, системи за противвоздушна одбрана и артилериски и ракетни системи“, рече Зеленски.
Зеленски е во Вашингтон за да се заложи пред Конгресот на САД да одобри продолжување на американската воена помош на Киев.
Руската инвазија на Украина почна лани на 24 февруари.
фото принтскрин