САКАТЕ ДА ПАТУВАТЕ, А ИМАТЕ СКРОМЕН БУЏЕТ: Има начин истражувањето на различни дестинации да биде поевтино

Добивај вести на Viber

Постои начин да се заштеди дури и ако станува збор за патувања и истите да се реализираат со поскромен буџет. Луѓето можат да патуваат надвор од сезоната, да бираат поевтино сместување, да патуваат автостоп и слично. Голем број странци веќе го практикуваат истото. Лиде Стојановска, туристички водич од Кратово вели дека во текот на својата работа сретнала туристи кои имаат различни приказни и се трудат да бидат економични, односно со помалку пари да посетат повеќе места.

„Има различни типови на туристи. Некои сакаат повеќе луксуз, а некои сакаат да заштедат повеќе за некое следно патување или пак имаат таков начин на живот и патуваат постојано. За да заштедат туристите при патување се одлучуваат за различни опции: патување во група низ повеќе балкански држави во пократок временски период, автостоп, сместување во приватни сместувања или во хостели, па дури и сместување кај луѓе кои што примаат туристи без да им наплатат за преспивање. Некои странски туристи се одлучуваат и да патуваат низ Македонија и Балканот со ранец или со камп приколки“, објаснува Стојановска.

Таа често води балкански тури и тие се поекономични од индивидуалните. На тој начин туристите посетуват повеќе држави и градови низ Балканот,  заштедуваат пари и време.

„Исто така имав можност да запознаам еден пар што патуваат со ранец низ светот-Ема од Шпанија и Томас од Америка. Ги запознав во 2019 година кога братучед ми ги качил по пат накај Кратово и јас им помогнав да најдат сместување во Кратово. Тогаш Ема имаше 55 години, а Томас 75 години. Сè уште сме во контакт и сè уште патуваат низ светот на истиот начин. Моментално се во Малезија. За да заштедат, но и за да ги избегнат гужвите дел од туристите се одлучуват да патуваат надвор од сезона. Кога не е шпицот на сезоната може да се најде поевтино сместување, па дури и рестораните може да се поевтини“, додава Стојановска.

Во однос на влезниците за музеите, во некои земји има поволности за студенти или други категории. Има земји со прецизен јавен превоз кој е објавен онлајн и туристот може да провери со кој превозник патувањето до соседниот град е најевтино. Многу јутјубери ги споделуваат своите искуства од посета на евтини држави, но пред да се тргне на пат, добро е да се провери и безбедноста на самата земја. Често има рангирања на држави кои се безбедни за соло патници. Ова може да им послужи на луѓето кои сами тргнуваат на патување. 

foto freepik.com/jcomp