Ќе се сложат ли малите акционери? „Тиквеш“ ќе гарантира за 12,5 милиони кредит на фирма што ја водат Свето Пивара и синот Јане

Добивај вести на Viber

Винарската визба „Тиквеш“ треба да гарантира пред Халк банка за 12,5 милиони евра кредит што ќе го земе фирма во која управители се првиот човек на „Тиквеш“ и негов постар син. „Тиквеш“ е успешна домашна компанија со силна извозна компонента. Но факт е и дека „Тиквеш“ има кредитни обврски кои надминуваат 20 милиони евра, а на нив лани винарската визба плати камати од 869.000 евра

Акционерите на најголемиот и најпознат производител на вино во Македонија треба да одлучат дали „Тиквеш“ ќе гарантира за банкарски кредит вреден 12,5 милиони евра на фирмата М-6 ЕДЕН ДОО Скопје. Ова е најновиот предлог што ќе се најде на дневен ред на претстојното акционерско собрание закажано за 29 април годинава.

Два аспекти го привлекуваат вниманието на инвеститорската заедница кои произлегуваат од објавената предлог одлука за ова акционерско собрание. Првиот аспект е тоа што познатиот македонски бизнисмен Светозар Јаневски се јавува како овластен претставник на „Тиквеш“, поточно претседател на Управниот одбор, а воедно и истовремено е и управител на фирмата за чиј кредит ќе гарантира „Тиквеш“.

Вториот аспект е во тоа што другиот управител во М-6 ЕДЕН ДОО е Јане Јаневски, синот на Светозар Јаневски.  

Според официјалните податоци јавно достапни во базата на Централниот депозитар за хартии од вредност, винарската визба „Тиквеш“ има еден доминантен сопственик. Тоа е друштвото М-6 ДОО од Скопје. Тоа одлучува самостојно за сите деловни зафати на „Тиквеш“ затоа што поседува 80,1 отсто од акциите. Ко-основач на тоа друштво, заедно со други членови на врвниот менаџмент, беше Светозар Јаневски како предводник на менаџерскиот тим на Пивара Скопје. По извонредниот успех со скопскиот бренд проиводител на освежителни пијалоци и пиво Јаневски и неговиот тим го превзедоа кавадаречкиот вински гигант „Тиквеш“.

Под нивна управа „Тиквеш“ помина процес за преструктуирање, оптимизација и континуирана инвестициска офанзива. „Тиквеш“ има изразена извозна компонента и неговиот менаџмент активно и континуирано работи за зголемување на неговото пазарно учество во премиум сегментот во продажба на флаширани вина како регионално така и континентално.

Според неревидираниот биланс за 2024 година обврските на „Тиквеш“ изнесуваат 33,5 милиони евра и се зголемени за 26 отсто во споредба со 2023 година. Од тоа над 20 милиони евра се обврски по долгорочни кредити.

 Н.С.