Сараќини: 15 мерки за помош на малите бизниси и 50% повеќе пари од лани

Добивај вести на Viber

Со 13,37 милиони денари (околу 217 илјади евра) Владата ке ги поддржува малите бизниси, соопшти министерот за економија Ваљон Сараќини кој денеска ја промовираше новата Програма за мали и средни претпријатија за 2013 година. „За 2013 година се обезбеди вкупно 13,37 милиони денари за поддршка на овие фирми, што е за 50 проценти повеќе од лани“, истакна Министерот. Согласно програмата се инкорпорирани три потпрограми, и тоа за конкурентност, за иновации и за претприемништво, а се воведени и 15 нови мерки кои треба да влијаат на конкурентноста на претпријатијата. Овде се вбројуваат финансиска подршка на бизнис инкубаторите и подршка на  бизнис центрите, финансиска поддршка на проекти за промоција на занаетчиството, за надоместување на дел од трошоците за деловните субјекти за воведување на ИСО стандарди и за воведување на ХАСАП систем, како и финансиска подршка за компаниите кои што планираат да воведат ХАЛАЛ систем. Дел од парите ќе се тошат и за организирање на бизнис натпревар за студентите, најави Сараќини. Финансиска поддршка во 2013 година е обезбедена и за женското претприемништво и за автентичните занаети, а ќе се надоместат дел од трошоците на деловните субјекти за развој на нов производ или за подобрување на постојниот производ, за воведување на еколошка ознака за производ, за развој на пазарот, за поддршка на патенти, како и на проекти од кластерските здруженија. За сите овие 15 мерки постојат различни критериуми за аплицирање и доделување на средствата, а сите тие ќе може да  се најдат на веб страната на Министерството за економија стартувајќи од 14 јануари.