СДСМ: Единствена цел на ВМРО-ДПМНЕ е политичка блокада
Објавено во: Македонија 27 Јануари, 2018
СДСМ реагира на активирањето на ВМРО-ДПМНЕ во амандманската расправа за Законот за јазици и велат дека опозицијаа сега продолжува со политиките на деструкција и блокади, коишто предизвикуваат политички тензии, поделби и раздор во општеството. Според владејачката партија ВМРО-ДПМНЕ досега имаше можност да учествува во процесот на донесување на Законот за употреба на јазиците, но наместо тоа по сопствен избор одбра да не учествува во реформскиот процес.
„Најавата дека ВМРО-ДПМНЕ ќе се врати во Собранието само за да блокира еден закон, е уште еден доказ дека опозициската партија продолжува да работи спротивно на интересите на граѓаните и државата и дека нејзина единствена цел е да создаде нова политичка блокада со која ќе го закочи реформскиот процес“, велат од СДСМ.
Од таму додаваат дека со таквото дејствување, ВМРО-ДПМНЕ е против европските вредности и против концептот на едно општество и уште еднаш докажува дека не се грижи за интересите и потребите на граѓаните, туку дека води ситни, провидни политикантски игри.
„Законот за употреба на јазиците е во согласност со Уставот на Амандманот 5 и истиот не фаворизира и не дискриминира ниту еден јазик, туку ја унапредува употребата на јазиците на сите немнозински заедници што живеат во Македонија. Законот не го доведува во прашање унитарниот карактер на Македонија, а употребата на македонскиот јазик и неговото кирилско писмо и понатаму остануваат единствени официјални службен јазик и писмо на територија на Република Македонија, во меѓународните односи, одбраната, монетарната политика и централната полиција“, велат од СДСМ.
Од ВМРО-ДПМНЕ, пак, повторно порачаа дека Законот е во спротивност на Уставот и Рамковниот договор.