СДСМ РЕАГИРА: Арсовска на штета на скопјани го прекинува проектот БРТ, тоа е скандалозно
Објавено во: Македонија 16 Декември, 2021
Скандалозен е последниот потег на Арсовска да го прекине проектот Бас Рапид Транзит, кој се спроведуваше со поддршка од Европската банка за обнова и развој, изјави на денешната пресконференција Стефан Васев од СДСМ.
„Три години се работеше овој револуционерен проект кој има за цел да внесе нов систем на ефикасен и еколошки јавен превоз во главниот град. Многу важен за скопјани. Со средства од ЕБОР и со средства од градскиот буџет, направени се истражувањата и изработка на студијата на која учествуваа сообраќајни експерти од земјава и странство, како и проект за првата траса“, рече Васев.
Тој нагласи дека беше потпишан и Договор со ЕБОР за наменски кредит од 70 милиони евра за изградба на двете траси на БРТ системот.
„Сега, заради лични хирови, Арсовска го укинува овој проект кој што веќе е во процес на реализација и од висок интерес на скопјани. Овој потег на Арсовска, освен што е против интересите на скопјани, е на директна штета на градот но и на државата, пред меѓународни финансиски институции како што е ЕБОР. Наместо да работи за граѓаните, таа работи по инструкции од Белиот дворец и раководството на ВМРО-ДПМНЕ. По првиот месец може да кажеме дека Данела Арсовска не се води од интересите на градот и не работи во интерес на скопјани“, рече Васев.