Се градат малите хидроцентрали: 30 до крајот на годинава, 80 во најава
Објавено во: Македонија 02 Септември, 2013
Кон крајот на септември ќе се објави нов тендер за изградба на мали хидроцентрали, најавија денеска Министерот за економија Ваљон Сарачини и за животна средина и просторно планирање, Абдулаќим Адеми. Предвидени се нови 80 локации, а сеуште се дискутира дали ќе се објават во еден тендер или ќе се поделат во повеќе, појаснија министерите.
Тие денеска се сретнаа со претставници на компаниите кои инвестираат во изградба на малите хидроцентрали. Вкупната инвестиција во 30-те мали хидроцентрали е 40 милиони евра. Од нив 16 веќе работат, додека останатите 14 треба се пуштат во употреба кон крајот на 2013 година. Во рамките на проектот „Отворено со бизнисот“, инвеститорите пред Сарачини ги изнесоа проблемите со кои се соочуваат, од оние административните, па се до изградбата на објектите и нивното пуштање во употреба.
Како што истакна претставникот на компанијата „Мали хидроелектрани“, фирма ќерка на „Енерџи истерн Јуроп“, Самоил Целески, голем дел од проблемите биле очекувани бидејќи првпат се реализираат вакви проекти во Македонија.
„Проектот продолжува да се реализира. Три мали хидроелектрани веќе се пуштени во употреба, една треба да се пушти за 1,5 месец, други две се во фаза на градба, а има и во фаза на подготовка на проекти, не очекува уште доста работа“, забележа Целески пред министерот.
За Сарачини пак, станува збор за сериозна инвестиција и сосема нов сектор.
„Досега е завршена огромна работа. Изградени се 16 мали хидроелектрани во период од 1,5 година и до крајот на годината ќе бидат завршени уште 14“, изјави по средбата министерот за економија кој додаде дека средбата била искористена да им се укаже на инвеститорите дека институциите се секогаш отворени за дијалог и поддршка.
Поголемиот дел од малите хидроцентрали се градат во Теарце, Липково, Демир Хисар и Радовиш.