СЕ ОЧЕКУВА ТЕШКА ЗИМА: Кој ќе помине поевтино, дали луѓето во градот или оние кои живеат на село?

Добивај вести на Viber

Во новата година повторно ќе имаме поскапување на струјата. Поради инфлацијата и енергетската криза нè очекува тешка зима, и затоа ги прашавме граѓаните, кој ќе ја помине поевтино, дали луѓето во градовите или оние кои живеат на село.

Секаде има сиромашни и невработени луѓе, но голем број се со ставот дека сепак на село ќе биде за нијанса полесно, затоа што таму мнозинството од жителите сами произведуваат храна, и најчесто имаат сопствени дрва за огрев. 

„Во Скопје ќе биде потешко, затоа што ние кои живееме  во згради немаме избор, немаме оџаци, мораме да се грееме на струја. Во село луѓето си произведуваат храна, имаат месо од домашно производство, а воедно и се хранат поздраво.  Има поединци кои со потценување гледаат на таквата работа, но од друга страна, тие луѓе си го исполнуваат времето, работат, и знаат што јадат, консумираат домашно и здраво. Луѓето на село обично имаат дрва, така што ем ќе зготват храна на дрва, ем ќе се згреат. Друга работа е дека имаат избор, можат да се греат на дрва или ако сакаат на струја“, вели Весна од Скопје.

Роберт Иванџиков од селото Стојаково раскажува дека повеќето  мештани имаат овошје и зеленчук од сопствено производство, си подготвуваат зимници, и ги задоволуваат потребите за храна.

„Мислам дека на село ќе биде полесно, затоа што луѓето си садат, си имаат храна, одгледуваат живина, стока, имаат јајца, месо“, рече тој.

Но, има и луѓе кои се на село, а сепак не се занимаваат со земјоделска дејност.

„Јас имав државна работа, никогаш не сум се занимавал со земјоделство, и сега сум во село, живеам од пензија, се греам на струја. Нема да биде лесно за никого, никој нема да биде поштеден  од кризата, без разлика дали живее во град или село. Луѓето обично садат домати, пиперки, зелка, но за многу други работи одат во продавница, купуваат храна, така што исто му доаѓа, сите ќе бидат погодени“, додава жител на струмичкото село Василево.

Арбен Халили, претседател на Центар за одржливо земјоделство и рурален развој – ЦЕСАРД вели дека кога се наоѓаме среде голема енергетска криза, не може точно да се каже, кој полесно ќе се справи со состојбата, дали луѓето во урбана или рурална средина.

„Веќе во планинските предели нема толку многу дрва, терените се оголени, така што јас купувам дрва во Тетово и ги носам во селото Шипковица. Но, поука од оваа криза треба да ни биде, да не се потпираме на греење на гас или струја, туку да ги искористиме тие 275 сончеви денови кои ги имаме во Македонија, да поставуваме сончеви панели“, рече Халили.

Друга работа на која треба да се посвети внимание е да се искористи максимално обработливото земјиште во Македонија, со тоа што и државните и приватните парцели ќе се даваат на луѓе кои сакаат да произведуваат храна. Халили вели дека добро би било и приватните лица кои поседуваат земјиште, или да го обработуваат, да го изнајмуваат или продадат на оние кои би засадиле или засеале нешто на тие површини. На тој начин Македонија ќе има доволно храна за населението. 

Земјава регистрираше инфлација од 16 отсто. Во јули минималната кошничка за едно семејство од четири члена изнесуваше над 47.000 денари. Во повеќе сектори има штрајкови или ќе има, со барање за повисоки плати. Но, не е само Македонија и регионот, туку енергетската криза и инфлацијата ја „тресат“ и Европа, при што има прогнози дека европските земји ги чекаат 5 до 10 тешки зими.

foto freepik.com/wirestock